好多鍾意炒單股槓反 ETF 嘅朋友注意！香港證監會 7 月 24 號出新規，修改結構性基金監管框架，推出「靈活槓桿結構」。南方東英 7 月 27 號跟住發公告，旗下 12 隻槓反產品全部改機制，8 月 3 號正式生效！今日 8 條核心問題一次過拆解你聽，炒呢類產品前你一定要知嘅規則！

Q1 邊啲產品受影響？

證監會規定容量高度受市況變化影響的槓桿及反向產品，須採用靈活槓桿結構，例如涉及南方東英旗下12 隻個股槓反產品。產品名會改，名會加「最多 / MAX」字眼。

Q2 仲係唔係 2 倍 /‑2 倍？

正常市況下，管理人會維持 2 倍正向、‑2 倍反向為目標；但如果市場流動性、成本因素等原因，管理人可以調低倍數，業界實施方案最低去到正向 1.1 倍 / 反向‑1.1 倍，上限唔會超過 2 倍。

Q3 係咪每日都會改倍數？

唔係！一般情況下，管理人會維持產品槓桿為 2 倍；只有極端波動、流動性唔夠先會調整，唔會無緣無故改倍數。

Q4 同一個交易日會唔會中途轉倍數？

唔會！每個交易日開市前就鎖定當日目標槓桿，全日唔會再變動。

Q5 幾時公布下一日的倍數？

亞洲時區股票（好似海力士、三星）：前一日收市後就可以公布；美股標的就喺當日開市前公佈槓桿倍數。

Q6 點樣分清哪些是靈活槓桿產品？

睇名！產品名會寫「最多 / MAX」，例如 南方東英英偉達每日槓桿最多 (2x) 產品 (07788)，產品文件亦會標註靈活槓桿結構。

Q7 邊度查每日目標倍數？

港交所披露易網站 + 產品發行商網站。

Q8 點解唔可以持有槓桿產品多過一日？

槓桿及反向產品並非為持有超過一日而設，每日收市強制再平衡 (rebalancing)。就算大方向睇得中，只要中間有震盪就會出現波動損耗，好大機會睇啱方向都輸錢。如果你想知多啲點計波動損耗，留言「想知」。

簡單總結

證監今次改規，目的係減低極端市況嘅跟蹤誤差。對散戶最重要兩件事：
第一，以後買呢啲產品，一定要睇當日實際目標槓桿，唔好默認永遠 2 倍，有可能實際倍數比你想像低，回報會同預期唔一樣；
第二，呢啲只係短炒工具，唔適合長揸。