穆罕默德沙拿今夏離開利物浦，但遲遲未官宣來季去向。據報主要原因係沙特足球唔再大花筒亂使錢，同沙拿嘅轉會談判傾唔埋欄，所以沙拿先至冇晒消息。
沙特傳媒報道，沙拿正同伊蒂哈德接觸，雙方就薪酬問題拉鋸。沙拿要求年薪5,000萬歐元（約4.52億港元），但伊蒂哈德只願意畀一半，亦即2,500萬歐元，待遇等如喺利物浦所得。雙方分歧甚大，而且伊蒂哈德企硬唔鬆口，所以無法達成協議。

其實沙拿一方要求嘅5,000萬歐元年薪，喺過去幾年沙特足球擴張時期唔算過分。比起C朗年薪2億歐元、賓施馬年薪1億歐元，沙拿要求嘅年薪同前隊友沙迪奧文尼睇齊，相當合理。
不過PIF（沙特公共投資基金）今季政策大轉向，沙特聯賽財務規則收緊，增兵策略回歸理性。34歲嘅沙拿喺呢個時候先至轉戰沙特，可以話錯過最佳時機。