美股三大負面因素 超買調整難免？

美股三大負面因素 超買調整難免？

上星期四至五開始估美股即將進入調整，不過直至今個星期二仍然偏強。

美股短期內有三個因素影響資金流，第一，財政部加大發債收回市場流動性；第二，7月加息預期；第三，美國SEC向幣安及Coinbase起訴。第三個因素，就係新嘅資金流負面因素，而呢個因素向來偏向利淡科技股，於是上一晚見到大價科技股回吐，個別細隻科技股接力炒。

NDX周線超買 本周調整更健康

繼續維持美股會調整嘅睇法，不過點樣確認睇法正確？觀乎過往納斯達克指數100指數（NDX）周線圖出現急升走勢後、至少連續兩周向上拋離保歷加通道上軸，當指數周結時以陰燭重新返回通道內，都會有額外兩至四周向下調整情況。

假若唔係陰燭？繼續陽燭升？繼續飛出保歷加上軸以外？亦唔好開心得太早，通常NDX急升後、拋離周線保歷加上軸周數過多，稍後調整嘅力度同速度只會更快更急更恐怖。所以，寧願今個星期開始調整會健康一啲。

大型科技股開始回氣

今個星期美國科技股炒風同波幅普遍縮減，所以短線最juicy嘅升浪大抵完結，已作減倉、繼續等調整做法未算過早，仍屬目前合理策略。估計6月底、7月初會有吸納機會，希望做到年內餘下時間低位，可予加倉。