晉佳 
晉佳美股下半年展望
納指破頂 大科企期權掀泡沫
今年正值美國大選周期第三年，如預期地上半年造好。此刻已無人不信美股牛市，但仍未到亢奮階段，下半年會否進入亢奮階段？機會不低。
回顧年初做上半年展望時，預測三件事估中兩件：
第一，宏觀經濟改善、聯儲局沒年初般鷹派；第二，難有新黑天鵝；第三件，自動駕駛抬頭，呢件事估錯了，皆因1月時估不中AI突起異軍成為市場焦點，但途中修正得到便沒問題。
今個下半年展望相對簡單，因為正值順風，符劇本運行，所以只作微調補充。
預測一：納指破頂
納斯達克100指數每次由跌市反彈超過0.618倍之後，都會破頂，而目前距離高位只有10%左右，所以預測半年內破頂非常合理。
宏觀因素驅動美股進一步上升嘅原因，就係年中放鷹、年尾偏鴿。首先，每年7至10月屬於美國通脹淡季，配合今年租金通脹回落，理論上7至10月美國CPI數字當中，應該會見到比目前樂觀形勢，重燃減息希望。美國非零息維持1年3個月左右，如果高息維持兩至三年，再融資就會困難，恐怕商業地產等等項目引發下一波危機風險增加。潛在危機越明顯，掉返轉減息誘因越大。
7月始終係擔心加息嘅時間，形勢上仍偏向有現金流強勁的公司，莫過於大型科技股，TSLA、NVDA、MSFT、META於7月中至8月尾業績，非常值得留意，屬7至8月重點Bet。
預測二：大型科企期權成為主戰場
大型科技股長期跑贏細股，可能形成一個過往大牛市未出現過嘅現象，就係風險資金主攻大型科技股期權市場。
由於期權市場深度已大到猶如普通正股一樣，倒不如炒大價股期權好過炒細價股了，於是細價股今次升市之中可能比較失色及遜色，但年尾如果炒減息預期，一批有融資需求的細價科技股，仍會跟炒一轉落後。
如果美股進入亢奮階段，會好多人因為科技股期權發達，與此同時，亦會有好多不知風險嘅人，於期權市場火速輸身家。問題係整個過程會否下半年完成。
而去到尾水，細價股起飛炒龍尾之時，可能係期權市場音樂椅遊戲玩完的時間。
風險：
最大風險莫過於其間出現商業地產爆雷，出現的話會引發調整，但如果逼令聯儲局短期放水，最終又係令科技股受惠。
短線又破頂？
原本估計NDX中線調整，似乎調唔落。
星期五晚因應核心PCE輕微低過預期、整體PCE明顯低過預期刺激，市場反應同想法好簡單，數據好就升，亦唔見獲利盤湧現，係好兆頭，估計即將破6月中高位，再沿保歷加上軸上升。
長線持貨繼續揸嘅前題下，可以再走一轉短線，NVDA上試保歷加上軸、挑戰450難度不高，如果做Option，MSFT、META亦係可以考慮介入之對象。TSLA於季度交付數據後已爆升，惟有等調整才部署博7月19日業績。
