晉佳 
美股最後上車機會？科技股如何趁調整低吸
散戶情緒高漲、主要指數進入超買水平，美股調整機率越來越高，一旦中線調整展開，卻有可能做出今年餘下時間低位。如何捕捉中線黃金上車位，不妨留意納指以至個股走勢⋯⋯
納斯達克100 NDX：
月線2 RSI 98.4，周線9 RSI 85.2，周線拋離保歷加上軸，都係中線嚴重超買水平。上一日NDX日線升抵保歷加上軸後回吐，加上四巫日令成交增加，於是投資者把握機會，選擇於大成交日子大手獲利。獲利過後，資金未必即時入場，加上大價股同樣超買，正路美股投資者會等調整進行多一段時間先會撈貨。
市場容易因應上述情況，情緒由亢奮變為冷靜，再由冷靜變為審慎，如果進一步變為恐慌，就會跌多啲，視乎沽壓有幾急。
以往績睇，假如由亢奮變為審慎，調整期可能四周或以上，高位跌幅6%以上。如果由亢奮變為恐慌，兩星期內由高位下跌10%以上。暫時睇，調整6%左右機會較大。呢轉調整會製造出今年下半年低位，可視為中線最後上車機會。
—
MSFT、AAPL、META：
同樣係升勢當中，周五大成交由頭沽到尾，蘋果AAPL走勢較明顯，6月至今試過兩次180樓上出現大成交陰燭，未明顯跌穿10周線就談不上中線調整，明顯穿呢個位係買入機會，MSFT、AAPL、META暫時分別係315、174、247。
NVDA：
NVIDIA最強勢美國大型科技股，但總會有段時間走得比較弱，弱到似弱勢股咁。假如要設定第一個調整位置，大約係400左右（假設現價NDX有6%跌幅，NVDA跟足跌幅），撈貨良機要由360樓下上調到380樓下了，再低已沒把握。
TSLA：
近期升得急，估計當大市回吐，Tesla相對上述其他股份回得深。假設6月9日低位242以上係短線亢奮價，調整低位理應明顯低過242，見220都有機會。
—
上述分析基於美股即將進入調整，始終大膽假設係必須。如果呢個時刻都未肯調整，越亢奮只會帶來越大調整力度，不是好事，要調整寧願現在開始調。
