新股趕半年結 巨星傳奇以外 有隻滄海遺珠
今年6月底前有一批新股趕上市,條款要有幾騎呢有幾騎呢,其中,周杰倫動用可能破紀錄的23間牽頭經辦人散貨,除此之外,新股當中有否滄海遺珠?
巨星傳奇(6683):不認購
之前暫緩上市,去到半年結最終願意降估值上市,上市最高市值由約60億元降至34億元,今次竟然用到23間聯席牽頭經辦人,印象中屬最高紀錄。動用多間行一齊散貨,上市後股份將會派散。
KEEP(3650):不認購
另一隻新股奇行種。KEEP主要生產運動產品同運動教學,聲稱有人工智能輔助概念。招股價範圍28.92元至61.46元,上下限價差闊之程度,可能係史上最高,相對市銷率為6.4倍至13.5倍,訂價形同虛設。市銷率6.4倍尚可(只係短期而言),13.5倍相比美國SaaS股更貴,虧損兼經營淨現金流出,不值得高估值。如果少人抽,近下限定價,股價尚有機會上升;如果多人抽,就派通街,潛台詞股肯定唔值61.46元。
假如你認購,佢夠膽61.46定價,屆時喊都無謂。
新傳企劃(1284):認購
當年新傳媒新股首日掛牌都有得大炒,成為一時佳話。上市多年後,楊受成將708隻殼賣給許家印,變成恒大汽車,然後楊受成收回新傳媒業務,如今又以大約5億市值分拆新傳媒上市。趁巨星傳奇搶FO之下上市,就係想靜雞雞上市,加上英皇自己友肯做Sponsor,如果未見太多人認購,上市表現應該不差,抽得過。不過,建議現金抽,人多恐防擠逼。
科倫博泰生物(6990):不認購
生科股Pipeline有ADC藥、靶點Her2及PD-L1等等欠特色,Her2 ADC藥的話,榮昌一早已上市,榮昌估值都只係略高過科倫博泰,看不出科倫博泰131億至157億估值有何吸引力。
眾安智慧生活(2271):不認購
眾安分拆出來,內房股分拆擺明係財困想Cap水,加上物管股周街都係,欠賣點。