騰訊控股, Bill叔叔最新看法

圖一
圖一

吹水文長篇慎入
騰訊控股
一隻我入行咁耐
全世界一直睇好咁耐的股王
個人都非常之認同
可惜從來未試過炒700贏大錢

個人成日都會買700正股
而且每天亦會買賣其衍生產品
玩得好短身 同埋老實講
呢排越玩覺得佢越難玩
究竟佢搞緊乜 理性分析下
尋晚出咗四張圖
一張張講

超短線700 走勢
26號29100 期指
29號29400期指
700股價可以話接近平頂
兩日都尚算叫做高開低收
呢度係短期內第一次背馳
之後就係無北水果幾日的橫行區
同期期指受內銀拖累下跌
700相對硬淨極之悶局橫行
呢度係第二次背馳
及後北水回歸
大家寄望大媽返來買企鵝
點知阿媽唔買企鵝仲走去沽
連續沽左幾日
星期五來講大市上晝上升下晝下跌
企鵝就由頭跌到尾
尾市明明期指有輕微反彈
但U盤竟然可以U最低
假設大媽未沽完
呢個情況唔會因為美國大升而改變
所以超短線來講 睇大媽就得
以往700跌得多
會有多資金流入相關好倉
但今次流入的資金相對地係比以往少好多
所以個人圖一總結
相信星期一就算高開
都比較難高開高收(700)
至少一班超短線嘅炒家
又或者沽左幾日的大媽有一定機率未沽完
當然星期一大媽可以直接買返上去都得
呢個即日睇牌就會分到
話說星期五U Day Low
又唔代表星期一一定再跌
股價單跳成日都有
1299 就係單跳表表姐

 

圖二
圖二

2020 3月疫情底起步
騰訊進入牛區
呢一類股王
如果你走去用黃金分割去畫
基本上畫唔到乜嘢位置出嚟
通常個人嘅做法就係用一個平台區
又或者叫密集區
睇返近呢一年多
騰訊雖然大升
當中好多時都調整完/橫行再爆上
所以坊間好多人睇好騰訊就係咁嘅原因
一個大型嘅橫行區震倉然後股價再創新高
冇錯呢一個往績一直都係咁
你而家睇圖都有啲類似
所以只要你睇好後市
呢度買700係非常之合理
但阿叔係超級終極淡友
我用後面啲圖解釋下我估佢下跌的原因
唔係單純同你講完位置就算
呢個圖仲有5個密集區
可以用來短炒用
可能之後騰訊會大爆升
咁樣相關位置就見唔到
估錯的話就講定唔好意思先

 

圖三
圖三

呢個係近期騰訊大股東減持後的走勢
市場資金多到爆係人都知
外圍大升 幣價大升係人都知
但你近月會發現買港股完全感受唔到上升
話說人哋水浸唔一定要買你
人地條仔有錢自己條仔可能仲係窮光蛋
700配股大特價 騰訊基本上冇跌過直接向上
其實配左咁多股 究竟有幾多人知
接咗貨嘅人係咪真係100%buy and hold
佢哋接完咁大舊貨
一定仲有其他野去組合式持有
當中涉及嘅嘢唔通又同你講
配股先跌後大升呢個情況係今年來講非常之常見
基本上任何東西大隻少少配股大跌
超級短線都係短家者的搵錢機會
呢條路實在太順順到我都有時唔信
睇返個圖其實配股已經一個月
暫時睇到嘅就係騰訊慢慢轉弱
話說呢個密集佢每次見到都彈
所以如果你睇好買有乜所謂
次次都升的位當然係買到佢穿為止
根本唔需要分析
一穿自動打便可
我用圖四去解釋點解要出呢張圖三

 

圖四

圖四騰訊2018年大股東首度減持
人哋係天使基金 D貨底真係平到笑
就係食股息都食到下世紀
但係點解人哋都要配股
梗係有人地的原因
記得當日配股有禁售期
冇記錯係半年左右
當年騰訊配完股股價都係冇即刻跌
大概用咗一個月時間橫行
而大部份嘅時間都係配股價之上
當然有好多人會講當日嘅市況同今日唔一樣 歷史不一定重演
呢個非常之啱
所以調返轉講
騰訊而家進入橫行區都唔代表之後會好似以往咁大升
講返呢個圖 三月底配四月底就開始正式跌穿配股價
雖然之後嘅五月六月曾經上升高於配股價 但睇返當年嘅期指對比
基本上又係一個背馳
同呢排嘅走勢極之類似
大家可以自己去睇吓
之後六月份打後嘅深度調整
有人可能會問如果真係跌咩位抵買
呢個真係冇人知
不過如果以往績去計
跌到咁上下 佢就會出嚟增持
當呢個情況發生
通常股價會喺一個月左右見到支持
到時如果睇好分段買便可以

個人嘅總結就係
市場乜人都有
睇好睇淡都無問題
冇人有水晶球
事後睇返先會知邊個啱
而且每人嘅入市策略都唔一樣
所以我個人最討厭回答股票問題就係咁
點知你同佢係
愛情長跑/一夜情/幾秒完
騰訊未來嘅走勢無論係升係跌
對於炒開短身的我 唔會好大影響
市場對於騰訊過於樂觀
我真係睇唔到有啲咩人睇淡科技類
而且仲要係騰訊
另外
話說阿叔呢排呀叔出親長文唱淡
個市就會彈少少
唔知呢次會唔會對騰訊股價有支持
🤣🤣🤣
Happy Sunday💪🏻
星期一食糊

以上資訊僅供參考,相關內容純屬個人意見,不代表本台立場。投資涉及風險,股票和結構性產品如窩輪、牛熊證之價格可升可跌,投資者可能會損失全部本金,請自行注意風險。