美股必睇！超級周CPI+議息 會否震撼市場？

美股必睇！超級周CPI+議息
會否震撼市場？

美國周二晚8:30公布5月CPI數據，周三晚聯儲局議息，所以稱之為超級周。

先講周二通脹數據：5月核心CPI按月升0.4%，按年升5.5%；整體CPI按月升0.3%，按年升4.9%。

符預期機會大

回顧4月核心CPI按月升0.41%，按道理5月會繼續放緩，原因係租金指數升幅正式開始放緩（上月0.4%），與此同時服務通脹卻持續；市場目前預計核心通脹按月升幅相信係0.35%至0.4%之間，符預期機會頗高。

大家可以留意，近期美國嘅CPI回落速度的確放慢，亦係通脹正常化嘅後期現象。

如果將0.4左右嘅按月通脹壓低至目標嘅0.2左右，需要一點時間，租金指數大約能額外幫到0.1個百分點左右，餘下要靠服務通脹減慢，但就業市場強勁底下，比較難。中期而言，比較大機會核心通脹會回落到按月0.2%至0.3%之間，估計Q3內開始落入呢個範圍。

市場對議息有顧忌 勢必放鷹

假如通脹真係符預期，美股最大可能嘅反應係先升後回，原因係市場對於周三議息會有所顧忌。

聯儲局周三公布議息結果，面對通脹回落速度偏慢，鮑威爾較大機會放鷹，令市場預計7月加息，至於到時真係加？又或者係出口術？目前預計56.2%機會7月加息，估計6月議息後，比率會進一步上升。

經過超級周後，除非CPI數據出現較低機率嘅低於預期（核心通脹回落至0.3%）劇本，否則美股較大機會調整。