晉佳 
人行降逆回購利率 牽一髮動全身
美國宣布CPI數據、聯儲局議息之前，先有一項消息，就係中國人行下調7日期逆回購利率，由2厘下調到1.9厘。
逆回購係指人行向商業銀行購買國債，釋放資金，而人行亦會收取銀行利率，到期後，人行再收返資金，係人行短期向市場放水嘅動作。今日逆回購利率下調，顯示繼銀行下調存款利率後，人行未來有可能將減息行動升溫，例如下調中期借貸便季（MLF）利率以及貸款市場報價利率（LPR）等等，作為全面減息部署。
中國減息原因何在？因為經濟差，與此同時物價低迷，有進入通縮嘅風險，減息未會導致惡性通脹風險，於是減息，但代價就係令到人民幣滙價走弱。美元兌人民幣去到7.16水平。
中國減息 料加劇美國放鷹部署
中國減息預期增加，亦會影響美國加息部署。按常理出牌，聯儲局更加確定放鷹，製造加息預期，即使今個星期唔加息，都會令市場覺得7月會加息。
中國減息之下、同時美國發放加息預期，第一個原因，即使中美聯繫日漸減少，美元相對人民幣強嘅話，美國至少可以將通脹壓力向中國輸出。第二個原因，係放鷹推動美元滙價向上，會減慢去美元化過程，減低個別國家持有人民幣嘅意欲。如此一來，別國商家見到人民幣貶值，喺貿易過程中收到人民幣，稍後都有可能將收到嘅人民幣兌換成美金，令人民幣可能進一步受壓，從而令美國繼續輸出通脹，一直循環落去。
議息後港股回復審慎
今晚美國公布CPI數據，固然為周三議息帶來影響，而港股喺周四亦有可能因為聯儲局放鷹而受影響，今日Tasty盤房節目中建議大家做好港股，包括吉利牛證54780以及比亞迪電子（285）等等，其實都係博今明兩日貨仔，好處係勝負易分。如果聯儲局周三晚放鷹，對於港股後市可能帶來比以往議息更大嘅衝擊。
