晉佳 
【美股分析】美股周四反彈 一個迹象顯示調整未完？
周三晚美股大幅調整，做出短期方向，雖然周四三大指數靠就業數據放緩而顯著反彈，不過，有一個迹象顯示，美股繼續整固機率偏高。若一定要給個可能性，大約預70%機會調整，30%即時破頂。目前靜待加倉機會，若然想炒個波幅，道指相對有合適產品，可以留意道指Put 10800， 向下博波幅嘅話，指數望32800點，升穿34300點止蝕。
至於港股，情況亦相若，同樣想博港股回落，可以留意美團（3690）PUT 61463，以正股128作為止蝕已足夠，目標看110甚至破底。
波幅收窄 由亢奮變為較冷靜
解釋先美股情況，雖然噚晚科技股反彈，但相比周初市場嘅亢奮情緒，去到周四晚反彈市當中，個股波幅見收窄。由此反映，市場由亢奮變為相對冷靜，唔容易無端白事再度亢奮，再講，進一步破頂亦需要波幅擴大去支持，於是喺整固之前，突然波幅擴大明顯破頂機率，理應相對小，需要有下個整固。
人氣股資金換馬
假如周三美股大調整被視為一個小震倉、形成短線大平賣機會，周三早段先急升、後急回嘅人氣股份PLTR同埋MRVL，理應喺周四保持大波幅、大成交嘅反彈才對，結果只係小反彈、成交萎縮，反映資金獲利後尋求換馬短期換馬，風險偏好減低。另一證據係NVDA，周四反彈未能收復周三跌幅，以近期最人氣股份計，要帶動指數破頂，暫未見有強大力度。同樣，周四反彈成交較周三下跌成交縮減。TSLA急升，可視為追NVDA落後。如此一來，減低咗NDX短線爆上破頂嘅機會。
留意下周二CPI數據
周五至周一美股調整？當然有可能，但又要注意，下星期二公布美國5月份CPI，目前市場預期核心CPI按月升0.4%，照計係符合預期至略低過預期機會大，CPI可能帶動美股中途反彈，因此預咗係反覆整固格局。
反覆整固成真嘅話，對今年餘下走勢而言，以昇爺嘅說法「用時間換空間」，係好兆頭，大約6月尾至7月初加注，維持係年底前最佳上車良機。
